Vereinsgeschichte
1990 – 2010
Aa in de letzten zwanzg Jahr is unsa Verein ganz schee aktiv gwen. Mia ham selber allerhand Veranstaltungen durchgführt wia de jährlichen Maifeste oder d’ Christbaumversteigerungen. Seit 1991 gibt’s in Aunkircha wieder jeds Jahr am Karsamstag a Prügelweihe. Wenn in Aunkircha oder Umgebung a Fest war, warn ma meistens dabei. Vom Volksfestausmarsch bis zu de Vereinsjubiläen, Pfarrfeste, Stadtfeste, Folklorefeste oda Maiduit – überall hamma mitgmacht. A jdeds Gaufest zwischen Aigen und Waldkirchen ham ma bsuacht. Und aa nach Österreich hamma oiwei wieda gfahrn, z. B. nach Bad Mühllacken, Haiming in Tirol oder mehrmals nach Ebensee am Traunsee.
Bis 1993 is weidahin jedes Jahr vor Ostern a Theater gspielt wordn. Dann ham se de schauspielerischen Aktivitäten mehra auf den herbstlichen Heimatabend verlagert. Überhaupt san de Heimatabende attraktiver gestaltet wordn. Nebn unsane eigana Leit ham jeds Jahr Musik- und Gsangsgruppen aus Nah und Fern mitgwirkt. Für Heiterkeit ham aa verschiedene Rätsel-Aktionen gsorgt. Z. B. hat amoi gschatzt werdn miassn, wia schwaar de Plattlerbuam mitananda san, oda was de Dirndl insgesamt für a Oberweitn zambringan, oda wiaviele Krautköpf dass nötig san, um an Vorstand aufzuwiegn.
Unsan 40. Geburtstag hamma wieda mit an Gaufest g’feiert. Über 70 Vereine aus Nah und Fern warn im Juni 1990 bei uns zu Gast. Sogar aus Bietigheim bei Stuttgart. Aber an Weitpreis hätten da Retten- berger Sepp und sei’ Frau Mary-Ann aus Amerika gwunga. Am Freitag und am Samstag hätts uns beinah davog’schwoabt. Trotzdem hamma unsa Fahnenmutter Klara Stöckl von dahoam abhoin kinna, wiar a se ghert. Unsane Frauen ham se auf des Fest eigens neue Stoffjacken schneidern lassen.
De hams dann glei ausführn kinna. Wegen dem Regn am Freitag und am Samstag hat da Gottesdienst am Sonntag net wia plant auf da Wies g’haltn werdn kinna. Kurzerhand is auf da Vereinsheim-Terrass’n da Altar aufbaut wordn und de Leit ham den Gottesdienst vom Parkplatz aus guat mitfeiern kinnt. Über’s Weda am Sonntag hat ma se net beklag’n kinna. Da Festzug am Namedog war beeindruckend und hat uns für ois entschädigt.
Des war des letzte große Fest unta da Vorstandschaft vom Rasch Wigg. In da Generalversammlung im Herbst hat er aus gesundheitlichen Gründen nimma kandidiert. Nach 33 Jahr hat er des Vorstandsabzeichen an sein Nachfolger Franz Rettenberger weidagebn. Da Franz war scho ois kloana Bua beim Trachtenverein und hat des Trachtlerische quasi scho mit da Muttermilch aufgnumma. Vor seiner Wahl zum 1. Vorstand war er jahrelang Vortänzer und beim Fest im Juni war er Festleiter. Da neie Vorstand hat ois erste Amtshandlung glei sein Vorgänger als Ehrenvorstand vorgschlagn. Dem hat de Versammlung einstimmig zuagstimmt. An dem Abend ham se no zwoa verdiente Trachtler aus der Vorstandschaft zruckzogn: Da Pfeiffer Hermann ois Kassier und da Wega Fredl ois zwoata Vorstand.
Unsa Patenverein "Donaulandler" Vilshofen hat 1991 sein 40. Geburtstag feiern kinna. Se ham uns bei unsam Fest stark unterstützt und dafür hamma uns iatz revanchiern kinna.
Im April 1992 ham neue Pächter unser Vereinsheim übernumma. A bissal gschockt warn ma scho, wia da Hans und d’ Vroni im Mai 1991 den Pachtvertrag g’kündigt ham. Se ham dann no weidagmacht, bis ma neue Pächter gfundn ham. Im Gegensatz zur Vroni und an Hans, de des Vereinsheim 15 Jahr lang gführt ham, ham eanane Nachfolger Kessi und Xaver Eder nur 13 Monat ausg’halten. Bereits nach an halbatn Jahr is uns klar wordn, dass ma uns scho wieda um neue Pächter umschau’ miassn. Ende April 93 ham se dann unsane Wege trennt.
Weil de neia Pächter aber erst ab Juli 93 kemma ham kinna, waar des Vereinsheim quasi zwoa Monat verwaist gwen. Da hat uns da Hölzlberger Helmut mit seina Familie aus da Not ghoifa und des Wirtshaus im Mai und Juni weidagführt. Unsane neia Pächter Annemarie Schubauer und Fritz Modes ham dann immerhin 6 Jahr durchg’haltn. Se hams net leicht ghabt, denn unsa Vereinsheim hat erste Abnutzungserscheinungen zoagt:
Zwischen Weihnachten und Silvester 92, also scho, als de Familie Eder no Pächter war, hat a Wasserrohrbruch im heruntern Manna-Klo dafür gsorgt, dass des ganze Klo neu gfliest und ei’gricht werden hat miassn. Und während der Pachtzeit von Annemarie und Fritz hats öfters amoi irgendwo a Rohr z’rissen.
Und unsa Vereinsheim hat uns no mehra Arbat beschert: Nachdem’s im Summa 1993 scho einagrengt hat, hat no vorm Wintereinbruch des
Saal-Dach neu deckt werdn miassn. Ende November ham ca. 25 freiwillige Helfer des oide Material entfernt, des ganze Dach verschalt und neu deckt. Außerdem san neue Dachrinnan anbracht wordn. Von da Fria bis spät in d’ Nacht hams g’werkelt.
Und weils no net glangt hat, is unsa Haus Ende 93 aa no an de Kanalisation angschlossn wordn. Des hat wieda an Haufa Arbat und Kosten mit sich bracht. 1994 is da Parkplatz begrünt wordn.
Neunmal hamma seit 1985 in unsam Vereinsheim jährlich an Flohmarkt abg’halten. Weil aba de Arbat oiwei mehra, de Entsorgung oiwei schwieriger und teuerer worden ist, hat uns des Ganze koa Freud mehr gmacht. Da hamma de Gelegenheit g’nutzt und san ois Mitorganisator beim Flohmarkt in Vilshofen ei’gstiegn. Seit 1994 helf’
ma dort mit beim Einrama und Verkaufa und mit Kuacha- und Tortenspenden. Dafür derf ma aus dem Erlös jeds Jahr a Spende erwarten.
1995 is wieda Zeit gwen für a Faschingshochzeit. Desmoi hat’s d’ Fuchs Silvia ois "Silvius Fuchsnhobel" und Bernhard Knödl ois "Josefine Schafflzuba" dawischt. Leida hats grengt, was obafoin hat kinna. Aber des hat de Narrische Gsellschaft net aus da Stimmung bracht. A Umzug is trotzdem gwen. Bei da Feier im Saal ham se de Leit wieda trickan und aufwama kinnt.
Seit Ende 1996 san wieda vui neie Kinda und Jugendliche zum Verein kemma. Eanan ersten Auftritt hams beim Maifest am 1. Juni 1997 ghabt. Bei de Heimatabende hams zoagn kinnt, was s’ ois glernt ham. Sehr beliebt is da Volksfestzug in Vilshof’, weil da vui Bekannte zuaschaun.
Voriges Jahr ham unsane Kinda gemeinsam mit dem Jugendchor an Gottesdienst gestaltet. Thema war die "Arche Noah".
Aba net nur Tanzen und Platteln hams glernt. Aa andane Unternehmungen san auf’m Programm gstandn.
Weihnachtsfeiern, Schlittenfahrn und Zeltlager, Bastel-, Spiele- und Rätsel-Nachmittage, Ausflüge und Wanderungen san bei de Kinda guat a’kemma. Oamoi hams sogar bei da Polizei in Vilshof’ in oana Zelle probesitzen derft. Auf’m Rottaler Bienenhof ham de Kinda sehgn kinna, wo da Hene (Honig) herkimmt. Vui Spass hat eana da Ausflug zur Sommer-Rodelbahn in St. Englmar gmacht. Und nach dem Besuch in der Bavaria-Filmstadt woitn alle Stuntman werdn.
Im Februar 1997 ham ma amoi s Besenbinden probiert. Rund 30 Leut san in d’ Hindinger-Werkstatt kemma. Drunter warn aa welche, de früher selber no Besen bundn ham. Se ham uns allerhand Tipps gebn und von früher vozählt. A jeder hat sei eigene Technik ghabt.
Drei Wocha später ham ma unser Wissen glei anwendn kinna: Bei da Passauer Frühjahrsmess hat da Dreiflüssegau an Stand ghabt und da ham ma unter anderem aa s Besenbinden vorgführt.
Im Oktober 1997 is aa des Dach über der Pächterwohnung neu deckt wordn.
S Politiker-Dablecka ham ma zum erstenmal im April 1998 beim Starkbierfest der "Pappies"
in Vilshof’ ausprobiert. Da Englmüller Wolfgang hat ois Schweiklberger Geist de Großkopfatn d’ Leviten glesen. Unterstützt is er von da Theater-Gruppn wordn. Es war a groussa Erfolg.
1999 ham se unsane Frauen mit da Trachtenberaterin vom Dreiflüssegau zamgsitzt und ham se a neie Tracht entwerfa lassn. De bisherige Tracht is in da Seitn mit an Reißverschluss zuagmacht wordn. Des war da Trachtenberaterin oiwei scho a Dorn im Auge. De neie Tracht wird iatz vorn mit an Latz gschlossn.
1999 wars wieda amoi soweit: Im und am Vereinsheim is umanandabaut wordn. D’ Küch is vogressert wordn und a Getränkemarkt is an’baut wordn. De ganze Bauerei hat aa an
Grund ghabt: Vorher ham nämlich unsane Pächter Annemarie und Fritz Modes kündigt. Mit dera Baumaßnahme woit ma unsane neia Pächter optimale Bedingungen schaffa.
Im Oktober 1999 ham Thomas Wagenpfeil und Franz Resch eanan Dienst antretn. Und unsa Vereinsheim hat nach 25 Jahr an Nam kriagt: "Aumonte-Stub’n" ham ses gnennt.
"Au" steht für "Aunkircha", "Monte" is des italienische Wort für "Berg" und "Stub’n" steht für "Boarische G’miatlichkeit".
Im März 2000 war d’ Faschingshochzeit wieda fällig. Desmoi is unsa Brautpaar scho a bissl "übertragn" gwen: D’ Anna Stöger ois "Muggal Hanslbauer" und da Wolfgang Salatmeier ois "Wolfine Sabbelmeier" ham de Junga zoagt, dass aa de gsetztere Generation no mitmischn kann.
Im Juni 2000 hamma unsan 50. Geburts- tag gfeiert. Desmoi mit an Bezirksfest, weil ma s Gaufest net zuagsprocha kriagt ham. Zerst hat aba no a Hürde überwundn werdn miassn: s Patenbitten bei de "Donaulandler" Vilshofen. Se warn net gar so streng. Scheitlknian hat aba
scho sei miassn.
Den Festgottesdienst mit Bänderweihe hat unser Herr Pfarrer Walter Schlichting gfeiert. Wer hätt des denkt, dass des sei letzts Trachtenfest in Aunkircha war. Im Oktober is er gstorbn und mia ham mit eam an guatn Freind verlorn.
Mit sei’m Nachfolger, Pater Stephan Raster, ham ma Glück ghabt. Er führt mit uns alte Traditionen weida, z. B. de Prügelweihe am Karsamstag.
2002 san ma aa auf dem Gebiet der Denkmalpflege aktiv wordn. Da Kreisheimatpfleger Ludwig Maier hat uns um Unterstützung bei da Rettung der Hörgessinger Kapelle gebeten. An ihram Standort war s durch Oberflächenwasser stark gfährdet. Unsane Leit ham de Kapelle umgsetzt und wieda hergricht. Im Mai hat Pater Stephan Raster de Kapelln im Rahmen einer Maiandacht neu gweiht.
An groussn Stellenwert hat bei uns oiwei scho d’ Kinda- und Jugendarbat.
Nach 1974 und 1993 ham ma im Oktober 2003 zum dritten Moi den Gaujugendtag ausgricht Desmoi gemeinsam mit de Trachtenvereine Vilshofen und Alkofen. Nach am feierlichen Gottesdienst in der Stadtpfarrkirche in Vilshofen san ca. 420 Jugendliche und Betreuer durchs Vils-Engtal nach Aunkircha gwandert. Unterwegs hams allerhand Wissenswertes über des Gebiet erfahren. Nach’m Mittagessen in Aunkircha ham se de Teilnehmer no mit Musik, Tanz und Spielen de Zeit vertriebn.
Nachdem der Auftritt beim Starkbierfest 1998 in Vilshof’ so erfolgreich war, hamma des Politiker-Dablecka auf Anregung von unsane Wirte 2004 aa in Aunkircha probiert. De Leit warn von dem ganzen Programm so begeistert, dass ma seitdem fast jeds Jahr des Starkbierfest gestaltet ham.
Bei da Generalversammlung im Oktober 2004 hat da Rettenberger Franz nach 14 Jahr als Vorstand nimma kandidiert. Neia Vorstand is da Kliesch Helmut wordn. Wia sei Vorgänger war aa er amoi bei an Fest da Festleiter. Da Franz hat als Beisitzer sei’ Erfahrung in de neie Vorstandschaft ei’bracht.
2005 war wieda a Faschingshochzeit. De Sandra Kremhöller als "Xandl Kreme" und da Bernhard Metzler als "Bernadette Matzlinger" ham desmoi dabei de Hauptrolln gspielt.
Ende April 2005 hamma wia jeds Jahr an Maibaum aufgstellt. Eigentlich war’s wia oiwei. Aba ebbs war desmoi trotzdem anders: Da Baam war von am Mitglied. Seit 1975 ham ma de Baam von der Stadt kriagt. Seit aba nach an Sturm und Käferbefall des Gemeindehoiz abghoizt wordn is, miass ma uns um private Spender schau’. Den ersten Baam hat de Familie Heringlehner aus Weg gstift. De weiteren Spender bis heit’ san de Familien Wagner aus Watzmannsberg, Walch aus Altham, Miedl aus Algerting, nomoi de Familie Heringlehner und de Familie Kaiser aus Hörgessing.
Nach 1986 und 1997 ham ma 2005 zum dritten Mal des Bezirks-Adventsingen ausgricht. Des hat unsam Pater Stephan so guat gfalln, dass ma seit 2006 selber jeds Jahr a Adventsinga in da Pfarrkircha veranstalten.
A bsunders Erlebnis war im April 2006 der Auftritt auf dem Schiff "Franconia" in Straubing. Dort ham ma für Behinderte und eanane Betreuer aus Unterfranken an bunten Abend gestaltet. Eigentlich hätt des Schiff nach Vilshof’ kemma soin. Aba weils wegen an Hochwasser net unta de Bruckan durchpasst hat, hats in Straubing bleibm miassn. Kurzerhand san ma mia zu eana gfahrn.
Da 7. Februar 2008 is a ganz a bsundas Datum. Da is ebbs passiert, an des hätt ma selber bald nimma glaubt: Da Verein war nach 37 Jahr endlich schuidnfrei! Unsa Kassierin hat des aso gfreit, dass s’ de Vorstandschaft spontan zu an kloana Umtrunk ei’gladn hat. Dass ma koane Schuidn mehr ham, hoaßt aba net, dass ma iatz mit’n Geld umanandahaun kinnan. Unsa Vereinsheim werd uns no gnua Arbat und Kosten beschern.
Im April 2008 ham ma wieda amoi in Adelshausen nach dem Rechten gschaut. Unsa Außenstellenleiter, da Miadl Helmut, hat uns zu sein’ 70. Geburtstag ei’gladn. Desmoi is aba grad a kloane Abordnung gfahrn.
Anfang 2010 waars boid a wenig stressig wordn. Zwoa grousse Veranstaltungen ham vorbereitet werdn miassn: De Faschingshochzeit und des Starkbierfest.
De Faschingshochzeit hat de Brautleit Sabine Stiller ois "Muggal Seistad" und Markus Krenn ois "Zenzal Wurzlinger" und da narrischn Vowandtschaft a guade Kondition abverlangt. Scho am unsinnigen Donnerstag is’ losganga mit da Geschlechtsumwandlung. Am Samstag war wieda fast des ganze Dorf auf de Fiass beim bunten Faschingstreiben auf dem Aumonte-Parkplatz. Nach da Trauung is im Saal dann weidagfeiert wordn bis in d’ Fria.
A anstrengender Tag war dann no da Faschingsdienstag. Zerst hat se de Faschingsgsellschaft beim Frauenfrühstück im Pfarrheim gstärkt. Dann sans nach Vilshof’ zum Faschingsmarkt gfahrn. Auf d’ Nacht hams dann alle aa no de Geschlechts-Rückwandlung über sich ergeh lassen miassn.
Des Starkbierfest war aa heuer wieda a Riesenerfolg. Da Saal war ei’daut voll. De Politiker und andane öffentliche Personen ham se vom Fredi und vom Reinhard allerhand anhörn miassn. Gesangseinlagen und de Firmenwerbungen ham unsane Lachmuskeln arg strapaziert.
Unsa Vereinsheim hat uns ganz schee auf Trab ghoitn. Kaum a Jahr, in dem’s nix zum Bau’ gebn hat – vor allem de letzten 10 Jahr:
- Ende 1999 hat a Rohrbruch an de Heizungsrohr’ behobn werdn miassn;
- Im Oktober 2000 ham ma an neia Ofa für d’ Heizung kriagt;
- Anfang 2001 is a neie Haustür beim Schützeneingang ei’baut wordn;
- 2001/2002 san 4 Fensta auf da Weda-Seitn erneuert wordn, a Rohrbruch bei de Toiletten im Erdgeschoss hat gricht werdn miassn und des Damen-WC im Erdgeschoss is renoviert wordn;
- 2003 is a neie Be- und Entlüftungs-Anlage in da Küch und de Gastzimmer installiert wordn;
- 2004 is da Saal renoviert wordn. Auf da Weda-Seitn im Saal san neie Fensta ei’gsetzt wordn;
- 2005 is de Dachrinna auf da Saal-Rückseit’n erneuert wordn und de Parkplatzzufahrt hat aa wieda amoi hergricht werdn miassn;
- Im Winter 2005/2006 hätt uns de Schneelast beinah s Dach ei’druckt. Durch Abkehrn hat des verhindert werdn kinna;
- 2006 san insgesamt 10 Fenster erneuert wordn.
- De letzte gressane Baumaßnahme war 2009. Da san des Herren-WC im Erdgeschoss und des Damen-WC im 1. Stock renoviert wordn. Außerdem is im 1. Stock a Behinderten-WC ei’baut wordn.
Aa unsane Wirtsleit ham oiwei wieda kleanane und gressane Arbatn durchgführt.
Trotz der vielen Arbat mit’m Vereinsheim is de Geselligkeit net auf da Streck bliebn. Schöne Erlebnisse warn de Vereins-Ausflüge in de letzten Jahr. D’ Wachau, Kaprun, St. Johann im Pongau, Untertauern und d’ Wurzeralm warn unsane Ziele. Erst vor a paar Wochan ham ma Hallstatt bsuacht.
(2006 - Wurzeralm)
Internet Explorer
Firefox